Reindeer Meat Prices Up 15% Across Sapmi - Bohccobierggu haddi loktanan olles sámis sulai 15 proseanta
(Yle Sami) Bohcobierggu haddi lea gorŋon lagábui 15 proseanta manjimus jagi áigge sihke Ruoŧas, Suomas ja Norggas. Gávppin lea šaddan divrasut oastit bohccobierggu, muhto dál maiddai boazoeaiggádat fitnejit buoret kilohatti. (English summary below)
Mikkel Triumf eaiggáda njuovahaga MT slakt Kautokeino ja son jahkká ahte haddeloktaneapmi čatnasa čielgasit dasa ahte man ollu leat olbmot geat hálidit bohccobierggu. - Jos lea váttis fitnet bohccobierggu, nu olbmot leat garvásat máksit eambbo bierggus, lohká Mikkel Triumf.
Okta dain stuorimus biergogávpaseaddjiin Ruoŧa bealde lea Eliassons Gárasavvonis ja Alexander Eliasson maid sihkkarastá loktanan biergohatti.
- haddi lea goarŋumin, sulai 10-15 proseanta lea loktanan manjimus jagi áigge.
Ruoŧas lea hálbbimus
Suoma bealde biergohaddi lea maid loktanan, gaskamearalaččat gaskkal 10 ja 15 proseanta. Jos geahččá gávpehattiid dábalaš gávpaseaddji olbmo dáfus, de Härkönen gávppis Káregasnjárggas dávttehis čoarbbealli maksá 24,9 euro (232 SEK) kilos. Eliassonis Ruoŧas jorba bohccočoarbbealli (dákti mielde) máksá 109 SEK kilos. Muhto jos boazu deaddá vuollai 80 kilo, de šaddá maid logi ruvnno vuoli kilohaddi Eliassonis. Norgga bealde leat stuorra hadde erohusat biergovuovdiid gáskka. Åge Pedersena njuovahagas Deanus bohccočoarbbealli(dákti mielde) máksá 190 SEK, go fas MT slakt Guovdageainnus bearrá 154 SEK kilos. Ná ruvjejuvvon ja čuhppon biergu šadda Ruoŧas čielgasit hálbbimus dáin golmma dávviriikain.
Olles gorut divraseamus Norggas
Go veardádallat olles gorudiid hattiid, de šaddá hálbbimus gávppašit Suomas,kilohaddi lea gaskamearalaččat 67 SEK. Ruoŧa bealde haddi lea 75 SEK kilos ja Norga lea divrraseamus 124 SEK kilohattiin.Muhto sihke Norggas,Suomas ja Ruoŧas ostet eambbo ja eambbo bohccobierggu:
- Sihkkarit gavdnojit olbmot geat váidet alla hattiid, muhto lihkká olbmot ostet bierggu ja orru ahte dat šaddá eambbo ja eambbo bivnnuhin, lohká Alexander Eliasson.
(The price of reindeer meat has increased both in the stores and for reindeer herders across the Sami reindeer herding area in Finland, Sweden and Norway, according to MT Slakt - the slaughter house in Kautokeino and Eliassons - one of the largest producers of reindeer meat in Sweden. Increased demand is cited as one of the principle reasons. Prices do vary considerably across the region. For example, prepared joints are cheapest in Sweden, then Finland, with Norway being the most expensive. Lower prices are received for smaller reindeer. When comparing consumer prices for whole reindeer carcasses, the price in Finland is the lowest (7.1 Euros/255 RUB/kilo), then Sweden (7.95 E/285 RUB/kilo), then Norway (13.15 E/475 RUB/kilo).
